Kombëtarja angleze e futbollit është përballur me një situatë sa kaotike, aq edhe të turpshme, vetëm pak ditë përpara debutimit në Kupën e Botës 2026.

Gjatë transferimit të pajisjeve logjistike nga baza stërvitore në West Palm Beach, Florida, drejt kampusit “Swope Soccer Village” në Kansas City, Missouri, ekipi anglez ka rënë pre e një vjedhjeje të madhe.

Sipas raportimeve, hajdutët kanë marrë pothuajse të gjithë materialin sportiv të skuadrës, përfshirë këpucët e personalizuara të lojtarëve kryesorë dhe pjesën më të madhe të topave të stërvitjes. Situata ka marrë përmasa absurde, pasi në bagazhet e mbërritura në destinacion është gjetur vetëm një top i vetëm.

Dyshimet e para të stafit të sigurisë së Anglisë bien mbi shoferët e kompanisë që ishte ngarkuar me transportin e pajisjeve. Ndërkohë, Policia e Kansas City ka reaguar menjëherë, duke arrestuar dy persona të dyshuar.

“Po hetojmë një vjedhje të mundshme të pajisjeve nga një automjet i ekipit, i cili ka mbërritur në Kansas City me një pjesë të konsiderueshme të sendeve që mungonin”, thuhet në deklaratën zyrtare të autoriteteve.

Federata Angleze e Futbollit (FA) ka nisur bashkëpunimin me policinë amerikane për lokalizimin dhe rikuperimin e materialeve të vjedhura, ndërsa paralelisht po zhvillohet një garë me kohën për të shmangur ndikimin në përgatitjet e skuadrës.

Menaxherët e logjistikës kanë kontaktuar urgjentisht kompanitë sponsorizuese për prodhimin dhe dërgimin e këpucëve të reja të personalizuara për lojtarët, me synimin që gjithçka të jetë gati përpara ndeshjeve zyrtare të Botërorit 2026.