Detaje të rënda janë zbardhur në një proces gjyqësor në Greqi, ku po gjykohet Kastriot Cenko, i akuzuar për vrasjen e bashkëshortes së tij, Alba Cenko, nënë e dy fëmijëve.

Sipas dëshmisë së tij në sallën e gjyqit, marrëdhënia mes çiftit ishte përkeqësuar prej kohësh, mes debateve të shpeshta, xhelozisë dhe dyshimeve për tradhti.

Ai ka deklaruar se besonte që bashkëshortja e tradhtonte me një shok të fëmijërisë së tij, por, sipas tij, ata kishin vijuar bashkëjetesën për shkak të fëmijëve.

Ngjarja e rëndë ka ndodhur më 29 nëntor 2024 në Ampelokipi të Greqisë.

“Debati fatal shpërtheu kur Alba më tha se do të më linte dhe se fëmija i vogël nuk ishte i imi. Kjo më errësoi”, është shprehur ai para gjykatës.

Sipas deklarimeve të tij, pas konfliktit ai e ka goditur bashkëshorten me çekiç në kokë, ndërsa fëmijët ndodheshin në një dhomë tjetër të banesës.

Hetimet tregojnë se më pas ai ka fshehur trupin fillimisht në një dollap dhe më vonë e ka zhvendosur në papafingon e ndërtesës, në përpjekje për të shmangur zbulimin.

Autoritetet greke kanë zbuluar gjithashtu se për disa ditë ai ka përdorur telefonin e viktimës për t’u dërguar mesazhe familjarëve të saj, duke krijuar përshtypjen se ajo ishte ende gjallë.

Ngjarja ka shkaktuar reagime të forta në opinionin publik në Greqi dhe në Shqipëri, ndërsa procesi gjyqësor vijon.