Kryeministrja italiane, Giorgia Meloni, njoftoi se ka kërkuar nga presidenti amerikan Donald Trump që të ndryshojë konfigurimin e Bordit të Paqes, për të lehtësuar pjesëmarrjen e Italisë dhe vendeve të tjera evropiane.

“Roma është e interesuar të jetë pjesë e bordit, por nuk mund të bashkohet për momentin për shkak të disa pengesave kushtetuese,” tha Meloni gjatë një konference për shtyp me kancelarin gjerman Friedrich Merz pas samitit Italo-Gjerman në Romë. Ajo shtoi se ka kërkuar gatishmërinë e Trump për të rihapur strukturën e bordit për të përmbushur nevojat e vendeve evropiane.

Kancelari Merz e mbështeti qëndrimin e Melonit, duke shtuar se është i gatshëm të hyjë në bord nëse ai do të përfshijë procesin e Gazës në një fazë të dytë, por jo sipas strukturës aktuale të qeverisjes.

Meloni gjithashtu shprehu shpresën se përpjekjet e Trump do të çojnë në përfundimin e luftës në Ukrainë, duke deklaruar se nëse kjo ndodh, Italia do të mbështesë dhënien e Çmimit Nobel për Paqen presidentit amerikan.

“Kam besim se ai mund të bëjë një ndryshim për një paqe të drejtë dhe të qëndrueshme për Ukrainën. Më pas, mund ta nominojmë Donald Trumpin për çmimin Nobel për Paqen,” tha Meloni.