Mikheil Kavelashvili, ish-futbollist dhe politikan populist i krahut të djathtë, ka bërë betimin si president i ri i Gjeorgjisë, në një periudhë të tensionuar politike dhe protesta të vazhdueshme. Kjo ka ndodhur në mes të një krize politike disamujore, e cila ka pasuar zgjedhjet parlamentare të tetorit, të cilat janë shoqëruar me akuza për blerje votash, votime të dyfishta, dhunë dhe frikësim.

Salome Zurabishvili, presidentja në largim e Gjeorgjisë, u largua nga rezidenca e saj në pallatin presidencial në Tbilisi më 29 dhjetor, por vazhdoi të mbante qëndrimin se ajo ishte ende presidentja legjitime e vendit. Ajo tha se Kavelashvili, i zgjedhur nga kolegji zgjedhor i dominuar nga partia në pushtet, Ëndrra Gjeorgjiane, ishte një president “jolegjitim”.

Protestat antiqeveritare kanë pasuar me intensitet që nga fitorja e Ëndrës Gjeorgjiane në zgjedhjet parlamentare të tetorit, ndërsa tensionet janë rritur pas vendimit të Qeverisë për të shtyrë negociatat e anëtarësimit të Gjeorgjisë në Bashkimin Evropian. Kjo ka shkaktuar një valë protestash, të cilat janë shoqëruar me veprime të dhunshme të policisë, arrestime dhe lëndime të protestuesve. Protestuesit e akuzojnë Qeverinë e Ëndrrës Gjeorgjiane për largimin e shtetit nga Bashkimi Evropian dhe për afrim me Moskën.

Në një fjalim para mijëra mbështetësve të mbledhur jashtë pallatit presidencial, Zurabishvili theksoi se do të vazhdonte të ishte “presidentja e vetme legjitime” dhe se do të vazhdonte betejën e saj për të mbrojtur demokracinë dhe orientimin pro-perëndimor të Gjeorgjisë. Ajo iu bashkua protestuesve në Tbilisi, duke marshuar dhe valëvitur flamuj të Gjeorgjisë dhe Bashkimit Evropian. Protestat e fundit janë shënuar me dhunë, ndërsa më 27 dhjetor, Shtetet e Bashkuara vendosën sanksione ndaj miliarderit Bidzina Ivanishvili, themelues i Ëndrrës Gjeorgjiane, për akuzat për minimin e demokracisë dhe favorizimin e interesave të Rusisë. Sanksionet u mirëpritën nga opozita dhe shkaktuan zemërimin e qeverisë së Gjeorgjisë.