Ministri i ri i Brendshëm, Ervin Hoxha, i cili është në detyrë prej gati dy muajsh, ka vendosur disa qëllime strategjike që duhet të realizohen në planin afatshkurtër dhe afatmesëm, deri në zgjedhjet parlamentare të vitit të ardhshëm. Projeket e planifikuara më parë, që tani do të kenë prioritet, përfshijnë disa nisma të rëndësishme.
•Një nga projektet kryesore është ndryshimi në Policinë e Shtetit. Ligji i ri i miratuar në seancën e fundit parlamentare u ofron mundësi të rinjve ambiciozë për të marrë role drejtuese. Me gradat e reja në Policinë e Shtetit, nuk priten vetëm rokada të zakonshme, siç ka ndodhur në 20 vitet e fundit, por edhe avancimi i një brezi të ri që dëshiron të kontribuojë në poste të larta. Gara për postin e kryepolicit është hapur këtë të hënë, dhe kandidaturat do të mblidhen për 7 ditë. Pas përzgjedhjes së drejtorit të përgjithshëm, gara do të vazhdojë për drejtuesit e qarqeve dhe departamenteve. Një fokus i veçantë i ministrit Hoxha është përmirësimi i komunikimit me publikun. Drejtuesit e rinj do të testohen në transparencën dhe komunikimin me qytetarët, dhe është e mundur që me emërimet e reja të ketë edhe gra në pozita të larta.
•Një tjetër projekt i rëndësishëm për ministrin Hoxha është implementimi i projektit “Smart City”. Ky projekt do të monitorojë 20 qytetet më të mëdha të vendit me kamera të cilësisë maksimale, të cilat do të kontribuojnë në sigurimin publik, veçanërisht në institucionet kyçe dhe shkolla. Kamerat e teknologjisë së lartë do të jenë në gjendje të identifikojnë paligjshmërinë në kohë reale dhe të ndihmojnë efektivët e Policisë Rrugore dhe asaj Kriminale në menaxhimin e situatave.
•I treti, dhe po ashtu i rëndësishëm për Hoxhën, është zhvillimi i kartës së identitetit digjital. Ky shërbim do të ofrohet shumë shpejt nga kompania shtetërore e prodhimit të dokumenteve biometrike, “Identitek”. Karta e identitetit digjital do të mundësojë që qytetarët shqiptarë të kenë një identifikim digjital në celularët e tyre, duke lehtësuar aplikimin dhe duke shmangur problemin e harresës së kartës në shtëpi.
