Ministri italian i Sportit dhe Rinisë, Andrea Abodi, ka vlerësuar marrëdhëniet e ngushta mes Shqipërisë dhe Italisë, duke e cilësuar nisjen e “Xhiros së Italisë” nga Tirana si një simbol të parë të dukshëm të një bashkëpunimi të qartë e të thellë mes dy vendeve.
Në një intervistë për Agjencinë Telegrafike Shqiptare (ATSH), gjatë një seminari në Taranto, të organizuar nga AMAN dhe ANSA, ministri Abodi tha:
“Italia dhe Shqipëria kanë një marrëdhënie të jashtëzakonshme, shumë të ngushtë, që shpesh mbetet vetëm tek kronika, por në të vërtetë është shumë më e pasur në përbërje.”
Duke folur për sportin si urë lidhëse, ai theksoi rëndësinë e futbollit, jo vetëm si lojë, por edhe në aspektin e zhvillimit të infrastrukturës, duke përmendur si shembull stadiumin “Air Albania”, projektuar nga një arkitekt italian.
“Është një marrëdhënie industriale që po konsolidohet dhe aspektin sportiv duam ta pasurojmë me përmbajtje.”
Ai vuri në dukje se “Xhiroja e Italisë” në Shqipëri, përfaqëson një fillim të ri dhe një moment historik të rëndësishëm, duke theksuar:
“Le të themi që një fillim i mirë është nisja e madhe e “Xhiros së Italisë”, që përfaqëson ndoshta rastin e parë të madh të një bashkëpunimi të qartë dhe të dukshëm që bashkon vendet tona.”
Abodi theksoi gjithashtu miqësinë historike mes dy vendeve, duke kujtuar mikpritjen e italianëve për shqiptarët, si dhe bashkëpunimin ekonomik të ndërmarrjeve italiane që operojnë prej kohësh në Shqipëri:
“Edhe pse Adriatiku na ndan, ne kemi një miqësi që është e përcaktuar nga kapaciteti i Italisë për të pritur shumë shqiptarë që gjetën këtu mundësi për jetën.”
Ky bashkëpunim në sport, dhe veçanërisht në ngjarje madhore si “Xhiroja e Italisë”, sipas tij, është një mënyrë konkrete për të thelluar më tej lidhjet mes Italisë dhe Shqipërisë, jo vetëm në aspektin sportiv, por edhe në kulturë, industri dhe miqësi.
