Ministri i Drejtësisë, Ulsi Manja, ka reaguar në lidhje me miratimin e amnistisë penale në parlament, duke shprehur vlerësimin e tij për arritjen e një konsensusi të tillë me kolegët e opozitës.
Manja theksoi se ky votim ka ruajtur traditën e mirë të Kuvendit dhe ka pasur mbështetje të gjerë në sallën parlamentare. Ai shtoi se nga projektligji i aprovuar nuk kanë përfituar subjektet e SPAK dhe GJKKO.
‘E kam paralajmëruar qysh në fillim të këtij sesioni parlamentar se amnistia do të kalonte me mbi 100 vota. Kur gazetarët e nderuar më kanë pyetur në oborrin e Kuvendit të Shqipërisë se “ku do ti gjesh votat”, jam përgjigjur me bindje se votat janë brenda kësaj salle dhe kam drejtuar gishtin nga salla e seancave plenare. Si Ministër Drejtësie, kam propozuar ligjin në qeveri me shpresën për të marrë të njëjtën mbështetje edhe në parlament nga deputetët e të gjitha prurjeve politike.
Dëshiroja të ruhej tradita e mirë që ka dominuar në atë sallë, sa herë ka patur votime për amnistinë penale përtej llogoreve politike e të mos isha unë “sebepçiu” i prishjes së kësaj tradite të mirë, nga të paktat që është ruajtur në atë sallë, nga ajo lloj politike e kulture balte që ka mbjellë ajo sallë në sytë e shqiptarëve. Gjithashtu, dëshiroja që puna e ekspertëve të cilët punuan me draftin e amnistisë të respektohej dhe të ishte larg çdo ndikimi politik, për të siguruar një akt mëshire për ata që kanë rënë në konflikt me ligjin penal, siç ua ka garantuar Kushtetuta dhe ligji.’
Ministri shprehu krenarinë për mbështetjen e 116 ligjvënësve për ligjin e amnistisë, duke e quajtur atë një akt humanizmi. Ai gjithashtu falenderoi të gjithë ata që kontribuan në miratimin e këtij ligji dhe u shpreh se është detyrë e autoriteteve të zbatojnë amnistinë pa vonesa.
Dje, kjo ndodhi në Kuvendin e Shqipërisë! Amnistia mori 116 vota pro në parim, ruajtëm traditën e mirë të asaj salle dhe votuam një produkt ligjor të punuar nga ekspertë të fushës! Por, asaj salle sigurisht që nuk do t’i mungojnë kulisaxhinjtë politikë dhe shpirtzinjtë e lindur që shohin “djallin” edhe aty ku humanizmi e mëshira janë qëllimi i vetëm i një ligji amnistie!
Dje, u pa qartë kush e përdori votën për qëllimet e ligjit dhe kush e përdori për politikë. Të bësh politikë me hallin e tjetrit është gjëja më e ulët për një qënie humane që në vend të zemrës një zot e di se çfarë ka!
Si Ministër Drejtësie, sot ndihem krenar, që me durim dhe këmbëngulje, 116 ligjvënës votuam ligjin e amnistisë që kaluam në qeveri me zero përfitim për subjektet e SPAK dhe GJKKO!’
Në fund, Manja u zotua për respektimin e aktit të miratuar dhe falënderoi të gjithë ata që e mbështetën atë në procesin e votimit në Kuvend.
