Marshime përkujtimore dhe protesta janë zhvilluar në Johannesburg pas vrasjes së nëntë grave, ngjarje që ka rikthyer zemërimin dhe frikën në Afrikën e Jugut për shkak të dhunës në rritje ndaj grave.

Gjatë dy muajve të fundit, policia ka gjetur trupat e nëntë grave në zonën Ekurhuleni, në lindje të Johannesburgut. Autoritetet po hetojnë nëse vrasjet kanë ndonjë lidhje me njëra-tjetrën.

Shumica e viktimave ishin të moshës 20 deri në 40 vjeç. Disa prej tyre u gjetën të zhveshura dhe me shenja që dyshohet se lidhen me dhunë seksuale.

Në Johannesburg u zhvillua edhe një garë përkujtimore në nderim të Elizabeth Moselakgomo, një prej viktimave. Ajo ishte zhdukur pasi kishte dalë për vrap dhe u gjet e pajetë disa ditë më vonë.

Pjesëmarrësit ndezën qirinj dhe mbanin një pankartë me mesazhin:

“Mjaft. Ndaloni femicidin.”

Dhjetëra persona, të veshur me të zeza, morën pjesë në marshimin përkujtimor në shenjë solidariteti me viktimat dhe familjet e tyre.

Debati për dhunën ndaj grave

Vrasjet kanë rikthyer debatin mbi dhunën me bazë gjinore në Afrikën e Jugut, ku kjo çështje u shpall katastrofë kombëtare në vitin 2025.

Organizata dhe aktivistë kanë kërkuar masa më konkrete për mbrojtjen e grave dhe parandalimin e dhunës, ndërsa hetimet për nëntë vrasjet vijojnë.

“Mjaft. Gratë tona meritojnë të jetojnë, të ecin, të vrapojnë dhe të ekzistojnë pa frikë”, deklaroi Uyinene Mrwetyana Foundation, organizatë që angazhohet në luftën kundër dhunës me bazë gjinore.

Ndërkohë, autoritetet po përpiqen të përcaktojnë nëse rastet e zbuluara në Ekurhuleni janë të lidhura mes tyre dhe nëse pas tyre qëndron një autor apo grup i përbashkët.