Prishtinë, 17 shkurt 2026 – Në një ditë ku Kosova shënon 18-vjetorin e Pavarësisë, monumenti ikonë NEWBORN u shndërrua në një vend përkujtimor me një mesazh të fortë qytetar. Një ditë më parë, kangjella hekuri u vendosën rreth tij si një simbol i “burgosjes” për dënimin e kërkuar nga Gjykata Speciale në Hagë ndaj ish-krerëve të UÇK-së, me 45 vite secili.

Sot, mbi monument janë vendosur 5000 emblema magnetike të UÇK-së, një reagim publik ndaj asaj që qytetarët e shohin si padrejtësi ndaj figurave kyçe të luftës për liri. Avokatët mbrojtës të ish-krerëve theksuan se një dënim i tillë do të rishkruante historinë e Kosovës dhe do të cenonte luftën e saj për pavarësi.

Në Hagë, aktualisht mbahen Hashim Thaçi, Jakup Krasniqi, Kadri Veseli dhe Rexhep Selimi, të cilët konsiderohen si pjesë e rezistencës historike për lirinë dhe shtetndërtimin e Kosovës.

Ky akt simbolik pranë NEWBORN lidhet ngushtë me përvjetorin e 18-të të Pavarësisë dhe shërben si një mesazh qytetar për respektimin e kontributit të ish-krerëve dhe për ruajtjen e kujtesës historike të vendit.