Policia ka ndaluar Ariel Rrajën, nipin e ish-deputetit të Partisë Socialiste, Rrahman Rraja, dhe djalin e Flamur Rrajës, i cili ishte shpallur në kërkim për një ngjarje të ndodhur në tetor të vitit 2024 në zonën e Krujës. Ngjarja përfshin një sherr në banesën e shtetasit Kujtim Caca dhe familjarëve të tij, ku dyshohet se babë e bir, Flamur dhe Ariel Rraja, kanë ushtruar dhunë ndaj tyre për një çështje prone.

Pas ngjarjes, Flamur dhe Ariel Rraja ishin shpallur në kërkim. Ariel Rraja ishte më parë i arrestuar për shitje të lëndëve narkotike, ndërsa ky i fundit është ndaluar për veprën penale “Largimi i të burgosurit nga vendi i qëndrimit”, pasi ndaj tij ishte caktuar masa e sigurisë “Arrest në burg” nga Gjykata e Tiranës. Gjatë operacionit për arrestimin e tij, janë proceduar penalisht edhe Flamur Rraja dhe shtetasi E. T., pasi kanë kundërshtuar punonjësit e Policisë dhe nuk iu janë bindur urdhrit për shoqërimin e 24-vjeçarit në komisariat.

Ky ndalim ka lidhje edhe me një ngjarje të njohur që ndodhi në korrik të vitit 2023, kur Flamur Rraja ishte përfshirë në një incident të dhunshëm ndaj vëllezërve Bilbil dhe Jashar Maja, të cilët u kërcënuan dhe goditën nga anëtarë të familjes Rraja. Ngjarja tronditi opinionin publik, dhe pas saj, Rrahman Rraja u detyrua të dorëzonte mandatin e deputetit, ndërsa protesta të forta u zhvilluan në zonën e Borizanës për aktivitetin e një guroreje që po shkatërronte shtëpitë e banorëve.