Votuesit në zonën elektorale të Makerfield i janë drejtuar sot kutive të votimit në një zgjedhje të pjesshme që mediat britanike e cilësojnë si një nga më të rëndësishmet në zhvillimet e fundit politike në Mbretërinë e Bashkuar.
Në qendër të vëmendjes është Andy Burnham, i cili kandidon për Partinë Laburiste me synimin për t’u rikthyer në Parlament dhe për të sfiduar drejtimin aktual të kryeministrit Keir Starmer brenda partisë dhe qeverisë.
Sipas raportimeve, Starmer është shprehur i gatshëm t’i ofrojë Burnham një post të rëndësishëm në qeveri në rast fitoreje, por mbështetës të kryetarit të Bashkisë së Mançesterit të Madh e kanë refuzuar këtë mundësi, duke argumentuar se fuqia e tij politike qëndron pikërisht te fakti se nuk është i lidhur me dështimet e qeverisë aktuale.
Në këtë klimë tensioni brenda kampit laburist, mediat britanike raportojnë se mbështetësit e Burnham shpresojnë që Starmer të tërhiqet vullnetarisht për të shmangur një garë të brendshme për lidershipin e partisë.
Megjithatë, kryeministri Keir Starmer ka bërë të qartë se nuk ka ndërmend të japë dorëheqjen dhe se është i gatshëm të përballet me çdo sfidë ndaj drejtimit të tij.
Ndërkohë, raportohet se disa ministra të kabinetit janë këshilluar të mos largohen nga qeveria para zgjedhjeve, për të shmangur një krizë politike të mundshme.
Në mitingun përmbyllës të fushatës, Burnham ka deklaruar:
“Ndryshimi po vjen në Westminster”, duke e cilësuar votimin si një mundësi për ndryshim politik dhe ekonomik. Ai shtoi gjithashtu: “Është një votë për Makerfield dhe një votë për shpresën”.
Kundërshtari kryesor i tij është kandidati i partisë “Reform UK”, e udhëhequr nga Nigel Farage. Burnham ka paralajmëruar votuesit për rrezikun e mbështetjes së kësaj force politike, duke argumentuar se fitorja e saj mund ta çojë vendin drejt një politike më përçarëse.
Zgjedhjet në Makerfield janë një nga tre zgjedhjet e pjesshme që zhvillohen sot në Britani, përfshirë edhe dy të tjera në Skoci, pas dorëheqjeve të deputetëve të SNP-së që fituan mandate të tjera në zgjedhjet e majit.
