OpenAI, kompania që qëndron pas zhvillimit të ChatGPT, është në bisedime për një raund të ri shitjeje aksionesh, që mund ta çojë vlerësimin e saj në 500 miliardë dollarë – një shifër që do ta bënte grupin privat më të vlefshëm të teknologjisë në botë, duke kaluar edhe SpaceX të Elon Musk, aktualisht i vlerësuar në rreth 400 miliardë dollarë.

Aktualisht, OpenAI është në përfundim të një raundi financimi prej 40 miliardë dollarësh të udhëhequr nga konglomerati japonez SoftBank, që e vlerëson kompaninë në 300 miliardë dollarë. Por sipas burimeve të afërta me procesin, OpenAI po synon një raund të ri shitjeje dytësore të aksioneve, ku punonjësit aktualë dhe ish-punonjësit mund të shesin aksionet e tyre, duke çuar potencialisht vlerësimin e kompanisë në gati dyfishin e asaj shume.

Bisedimet, ku janë përfshirë emra si Thrive Capital, vijnë në një kohë kur interesi për inteligjencën artificiale është në kulmin historik. Raportuar fillimisht nga Bloomberg, negociatat pasqyrojnë një etje të jashtëzakonshme të investitorëve për t’u pozicionuar tek kompania që mund të dominojë epokën e re të teknologjisë.

Një treg që po “vlon”: Fitime të mëdha, humbje të thella

Që nga lançimi i ChatGPT në fund të vitit 2022, të ardhurat vjetore të përsëritshme të OpenAI janë rritur në 12 miliardë dollarë, me projeksione që shifra të shkojë mbi 20 miliardë deri në fund të vitit 2025. Megjithatë, si OpenAI ashtu edhe konkurrenti i saj më i afërt, Anthropic, vazhdojnë të operojnë me humbje, kryesisht për shkak të kostove të larta të trajnimit dhe funksionimit të modeleve më të avancuara të AI-së.

Anthropic, që ka katërfishuar të ardhurat në 4 miliardë dollarë këtë vit, është gjithashtu në bisedime për të siguruar 5 miliardë dollarë investim shtesë që do ta vlerësonte në 170 miliardë dollarë.

Teknologjitë në garë: OpenAI vs Anthropic

Të dyja kompanitë janë në një luftë të ashpër për klientë, duke ofruar mjete që gjenerojnë tekst, kod apo imazhe. Vetëm këtë javë, Anthropic prezantoi përmirësime të reja në modelin e saj kryesor, që përmirësojnë ndjeshëm performancën në programim, ndërsa OpenAI publikoi modele “open-weight”, që mund të përdoren dhe përshtaten falas nga zhvilluesit.

Gjithashtu, OpenAI pritet të lançojë gjatë gushtit modelin shumë të përfolur GPT-5, që besohet se do të përfaqësojë një tjetër kapërcim teknologjik në fushën e inteligjencës artificiale.

Një e ardhme e formësuar nga AI

Gara mes OpenAI dhe rivalëve të saj nuk është thjesht për vlerësime astronomike. Bëhet fjalë për kontrollin e platformave që pritet të formësojnë të ardhmen e dijes, punës, komunikimit dhe teknologjisë. Investitorët e mëdhenj po luajnë një lojë të gjatë, me shpresën se “kampioni” i inteligjencës artificiale do të jetë kompania e parë private me vlerë triliona dollarëshe.

Ndërsa investimet rriten dhe modelet përmirësohen, një gjë është e qartë: e ardhmja është artificiale – dhe është në shitje.