Drejtori i Onima, Ekrand Shabani, është ndaluar për 48 orë nën dyshimin për kryerjen e veprës penale “Ngacmimi”.

Lajmi është konfirmuar nga zëdhënësja e Prokurorisë Themelore në Prishtinë, Kaltrina Shala, e cila bëri të ditur se ndalimi është kryer me urdhër të Prokurorit të Shtetit.

“Lidhur me pyetjen tuaj, ju njoftojmë se me urdhër të Prokurorit të Shtetit, është ndaluar për 48 orë, një person me inicialet E.Sh., për shkak se i njëjti dyshohet për kryerjen e veprës penale ‘Ngacmimi’ nga neni 182 i Kodit Penal të Republikës së Kosovës. Prokurori i shtetit është duke i ndërmarrë të gjitha masat dhe veprimet e nevojshme hetimore lidhur me këtë rast”, thuhet në reagim.

Kujtojmë se në muajin mars, këngëtari Gjesti kishte bërë të ditur se, në konsultim me avokatët e tij, kishte dorëzuar kallëzim penal ndaj kompanisë Onima, stafit dhe bashkëpunëtorëve të saj.

Në një deklaratë për mediat, artisti ishte shprehur se kërkonte vetëm të drejtat dhe paratë e tij.