Ashtu siç ishte parashikuar, në orën 10:00 ka nisur seanca e parë e legjislaturës së XI-të të Kuvendit të Shqipërisë, i dalë nga zgjedhjet parlamentare të 11 majit.

Në sallë janë ulur 140 deputetë, prej të cilëve 72 e nisin për herë të parë mandatin. Partia Socialiste siguroi 83 mandate, opozita demokrate dhe aleatët 50 mandate, ndërsa 7 mandate shkuan për forca të reja politike: PSD e Tom Doshit me 3 deputetë, Partia Mundësia e Agron Shehajt me 2 deputetë, si dhe nga një mandat për “Nisma Shqipëria Bëhet” e Adriatik Lapajt dhe Lëvizja Bashkë e Arlind Qorit.

Seanca konstituuese u hap nga deputeti i PS-së Vasil Llajo, pasi Sali Berisha dhe Tritan Shehu refuzuan të kryenin këtë detyrë si deputetët më të vjetër në moshë. Llajo shpalli ngritjen e komisionit të verifikimit të mandateve, të përbërë nga tre deputetet më të reja të Kuvendit: Marjana Koçeku, Zegjine Çaushi dhe Klodiana Çapja.

Pasdite, pasi të përfundojë verifikimi i mandateve, deputetët do të thirren një nga një për të bërë betimin. Në vijim, shumica socialiste pritet të propozojë zyrtarisht Niko Peleshi për postin e kryetarit të Kuvendit, emër i shpallur një ditë më parë nga kryeministri Edi Rama. Votimi do të zhvillohet me fletë votimi letre dhe kuti të posaçme, ku numërimi do të bëhet një nga një.