Kalojnë ditët, por ende nuk ka asnjë lajm për Floresha Prengun, 35-vjeçaren me origjinë shqiptare që prej vitesh jeton në Trento të Italisë dhe është nënë e dy vajzave të vogla. Sot është bërë një javë e plotë që nga momenti kur gruaja humbi çdo kontakt me familjen.
Sipas mediave italiane, më 22 tetor, Floresha doli nga banesa për të shkuar në punë, por nuk u kthye më në shtëpinë ku jetonte me bashkëshortin dhe vajzat e saj. Familjarët ngritën menjëherë alarmin, ndërsa policia dhe njësitë e zjarrfikësve të Trentos nisën kërkimet intensive, përfshirë edhe zonat përgjatë lumit Adige.
Megjithatë, pavarësisht përpjekjeve të vazhdueshme, asnjë gjurmë e saj nuk është gjetur. Si në ditën e parë, ashtu edhe në ditët pasuese, kërkimet kanë rezultuar pa sukses.
Mediat shqiptare dhe komuniteti shqiptar në Itali janë vënë në lëvizje për të shpërndarë informacionin, me shpresën që nëna e re të mund të gjendet dhe të kthehet shëndoshë në familje.
Burime nga autoritetet italiane konfirmojnë se një njoftim zyrtar për zhdukjen është shpërndarë në të gjitha prefekturat e vendit, ndërsa thirrja për ndihmë publike mbetet e hapur:
“Kushdo që mund të ketë parë ose të ketë ndonjë informacion për Floresha Prengun, 35 vjeç, të kontaktojë menjëherë në numrin emergjent 112.”
Ndërkohë, ankthi i familjes sa vjen e shtohet, ndërsa dy vajzat e vogla të Floresha Prengut presin ende që nëna e tyre të kthehet në shtëpi.
