Vota e emigrantëve është baseni më i madh i votave të lira, të cilat nuk mund të manipulohen, u shpreh Oerd Bylykbashi, nënkryetar i PD-së, gjatë një tryeze me partitë, ku u diskutua mbi reformën zgjedhore.

Bylykbashi theksoi se administrata publike nuk duhet të marrë pjesë gjatë fushatës zgjedhore, një propozim ky që nuk është pranuar. Për votat e emigrantëve, ai sugjeroi aplikimin e një sistemi me një postë ndërkombëtare.

Sipas Bylykbashit, socialistët kanë diskutuar për katër vjet për të futur si një të drejtë votën e diasporës, por nuk kanë treguar vullnet të vërtetë për ta zbatuar. Ai propozoi që Ministria e Brendshme të hiqet nga procesi dhe të jetë KQZ-ja ajo që menaxhon votat e emigrantëve. Gjithashtu, ai kërkoi që adresa e ligjshme e një shtetasi jashtë Shqipërisë të mos jetë domosdoshmëri për të pasur të drejtën e votës.

Bylykbashi vuri në dukje se janë mbi 2.2 milionë shqiptarë që jetojnë jashtë, ndërsa të regjistruar janë vetëm 18 mijë, ose më pak se 1%, duke theksuar se edhe këta janë zgjedhur në mënyrë selektive.

Deputeti i PD-së dhe bashkëkryetar i komisionit për reformën zgjedhore, akuzoi socialistët për mungesë vullneti në zbatimin e vendimit të Gjykatës Kushtetuese lidhur me votën e emigrantëve, të cilët sipas tij, përbëjnë një basen që mund të ndikojë në rotacionin e pushtetit.

“Kemi kërkuar që të përfshihen penalitete në Kodin Penal, por kjo nuk është pranuar nga socialistët, për shkak të sistemit të patronazhimit,” tha Bylykbashi.

Ai shtoi se çdo mundësi për rotacion politik është bllokuar. Bylykbashi theksoi rëndësinë e koalicioneve zgjedhore, të cilat aktualisht nuk lejohen. Sipas tij, nëse koalicionet do të lejoheshin, Partia Socialiste do të kishte fituar vetëm 69 mandate në zgjedhjet e 2021-shit, duke mos arritur të formojë qeverinë me mandatet e nevojshme.