Ministrja e Arsimit, Ogerta Manastirliu, ka reaguar ashpër ndaj deputetes Ina Zhupa gjatë një interpelance në Kuvend, duke e akuzuar atë për përdorim politik të një situate tragjike dhe për dezinformim të publikut. Në fjalën e saj, Manastirliu theksoi se interpelanca nuk po përdorej për të adresuar çështje konkrete dhe përgjegjësi, por për të krijuar një zhurmë politike me synime personale.

Ministrja u shpreh se përparësia e politikës duhet të jetë njeriu dhe jo interesat personale. Ajo e cilësoi qëndrimin e Zhupës si një shembull të papërgjegjshmërisë politike:
“Kur jepet përparësi politikës dhe jo njerzillëkut, kjo është fundi i politikës si qëllim për njerëzit. Në vend që të tregoni përgjegjësi, po e ktheni këtë interpelancë në një moment për përfitime politike personale. Kjo është kulmi i papërgjegjshmërisë.”

Manastirliu mbrojti performancën e Ministrisë së Arsimit, duke theksuar reformat dhe projektet e zbatuara në sistemin arsimor. Ajo përmendi rritjen e pagave të mësuesve dhe përmirësimin e infrastrukturës shkollore, duke vënë në dukje gjendjen e sistemit arsimor në të kaluarën:
“Nxënës dhe breza të tërë u lanë në harresë. Shkollat ishin si stalla. Ne po ndërtojmë arsimin hap pas hapi me qindra projekte që janë në zbatim. Paga mesatare për mësuesit sot është 900 euro.”

Manastirliu i bëri thirrje Zhupës që të mos përdorë situata tragjike për përfitime politike dhe të mos dezinformojë publikun:
“Mos e ktheni dhimbjen e njerëzve në teatër. Shqiptarët e dinë kush punon dhe kush bën zhurmë. E vërteta nuk mund të mbytet nga zhurma e akuzave.”

Ministrja përfundoi me një mesazh optimist për rezultatet e punës së qeverisë dhe një paralajmërim për zgjedhjet e ardhshme:
“Shqiptarët do t’ju japin përgjigjen e tyre në 11 maj 2025. Edhe akuzat tuaja, edhe deklaratat politike, shumëzohen me zero nga kryetari juaj dhe nga qytetarët.”

Fjalimi i Manastirliut u shoqërua me duartrokitje nga deputetët e mazhorancës, ndërsa debati me Zhupën mbeti i ashpër dhe polarizues.