Një parcelë e hapur rishtazi në një zonë pyjore është zbuluar nga policia në Librazhd, ku kultivoheshin fidanë kanabisi, ndërsa dy persona janë vënë në pranga.

Operacioni i koduar “Faza e parë” u zhvillua në fshatin Xhyrë, pas një hetimi proaktiv të ndërmarrë nga Komisariati i Policisë Librazhd, në bashkëpunim me Drejtorinë Vendore të Policisë Elbasan dhe në koordinim me Prokurorinë.

Sipas burimeve zyrtare, në zonën e pyllëzuar ishin ngritur platforma polistiroli ku kultivoheshin fidanë të lëndës narkotike. Gjatë ndërhyrjes, policia asgjësoi bimët, ndërsa sekuestroi edhe një automjet dhe tre telefona celularë që dyshohet se përdoreshin nga autorët.

Në përfundim të operacionit u arrestuan shtetasit O. L., 24 vjeç dhe R. B., 26 vjeç, të dy banues në Xhyrë.

Materialet procedurale i janë referuar Prokurorisë së Elbasan për veprime të mëtejshme, ndërsa hetimet vijojnë për të zbardhur plotësisht këtë aktivitet kriminal.