Policia e Shtetit ka vijuar me intensitet të lartë operacionin e koduar “Operacionalja”, një aksion i gjerë që po zhvillohet në disa qytete të vendit për kapjen e personave me rrezikshmëri të lartë shoqërore, të shpallur në kërkim ndërkombëtar.

Në 12 orët e fundit, Drejtoria e Forcës së Posaçme Operacionale në Departamentin e Policisë Kriminale ka finalizuar dy faza të reja të këtij operacioni, duke bërë të mundur arrestimin e dy shtetasve të kërkuar nga autoritetet italiane.

“Operacionalja 39” u zhvillua në Dibër, ku u kap dhe u arrestua Klodian Llomi (i njohur edhe si Mazari), 34 vjeç, banues në Maqellarë. Ky shtetas ishte dënuar nga Gjykata e Apelit në Romë me 6 vjet, 7 muaj e 2 ditë burg për pjesëmarrje në organizatë kriminale, trafikim të lëndëve narkotike dhe shfrytëzim prostitucioni.

“Operacionalja 40” u zhvillua në Fushë-Krujë, ku u kap Roland Ibrahimi, alias Ali Meci, 40 vjeç, banues në Laç. Ai ishte shpallur në kërkim nga Gjykata e Torinos dhe ishte dënuar me 4 vjet e 3 muaj burg për organizatë kriminale, grup kriminal dhe vjedhje të rëndë.

Të dy personat janë arrestuar me qëllim ekstradimi drejt Italisë.

Operacioni “Operacionalja” vijon në të gjithë vendin me qëllim kapjen e personave të tjerë në kërkim ndërkombëtar dhe kombëtar, duke theksuar angazhimin e Policisë së Shtetit në luftën kundër krimit të organizuar dhe garantimin e rendit dhe sigurisë publike.