Vijon operacioni i koduar “The Wanted” për kapjen dhe ekstradimin e shtetasve të shpallur në kërkim ndërkombëtar. Në fazën e radhës të këtij operacioni, autoritetet kanë finalizuar arrestimin në Gjermani të një shtetasi shqiptar të kërkuar nga drejtësia shqiptare.

Si rezultat i bashkëpunimit mes Interpol Tiranës dhe homologëve gjermanë, u lokalizua, u kap dhe u arrestua me qëllim ekstradimin në Shqipëri shtetasi Hito Musaj, 60 vjeç.

Sipas autoriteteve, Musaj akuzohet se ka përvetësuar një apartament në qytetin e Vlorës përmes falsifikimit të dokumenteve. Më pas, ai dyshohet se ka prishur apartamentin dhe ka ndërtuar në vend të tij një objekt tjetër me përmasa më të mëdha.

Gjykata e Shkallës së Parë e Juridiksionit të Përgjithshëm Vlorë, me vendim të datës 19 qershor 2022, i ka caktuar këtij shtetasi masën e sigurisë “arrest në burg” për veprat penale “Falsifikimi i dokumenteve”, “Shkatërrimi i pronës” dhe “Pastrimi i produkteve të veprës penale apo veprimtarisë kriminale”.

Sipas hetimeve, H. M. ka përvetësuar apartamentin e shtetasit J. M. duke përdorur një leje ndërtimi të falsifikuar, duke i shkaktuar dëme të konsiderueshme pronarit ligjor.

Interpol Tirana bën me dije se, në bashkëpunim me autoritetet gjermane, po kryhen procedurat ligjore për ekstradimin e 60-vjeçarit drejt Shqipërisë, ku ai do të përballet me drejtësinë për akuzat që rëndojnë ndaj tij.