Shërbimi i dializës dhe Programi Kombëtar i Kontrollit Mjekësor Bazë (Check-Up) do të administrohen nga Operatori i Shërbimeve të Integruara të Sterilizimit (OSHIS), pas vendimeve të fundit të Këshillit të Ministrave.

Me këtë zgjerim të kompetencave, OSHIS shndërrohet në operatorin publik që do të menaxhojë tre shërbime kombëtare të sistemit shëndetësor, pasi më herët mori në administrim edhe shërbimin e integruar të sterilizimit.

Gjatë një inspektimi në ambientet logjistike të OSHIS, ministrja e Shëndetësisë, Evis Sala, deklaroi se modeli i ri synon rritjen e standardizimit dhe kontrollit mbi cilësinë e shërbimeve shëndetësore.

“Me vendimet e fundit të Këshillit të Ministrave, OSHIS do të administrojë edhe dy shërbime kombëtare me ndikim të drejtpërdrejtë te qytetarët: Check-Up dhe dializën. Kjo do të thotë më shumë standardizim, më shumë kontroll mbi cilësinë, më shumë eficiencë dhe mbi të gjitha më shumë siguri për pacientët”, u shpreh ministrja.

Sipas saj, synimi është krijimi i një operatori publik të fortë, i cili do të garantojë shërbime të qëndrueshme dhe me standarde të njëjta në të gjithë vendin.

Duke folur për shërbimin e sterilizimit, Sala e cilësoi atë një nga hallkat më të rëndësishme të sigurisë së pacientëve, duke theksuar se qendra e re garanton procese të standardizuara, kontroll të cilësisë dhe gjurmueshmëri në çdo fazë të punës.

“Ky është një investim që rrit cilësinë, ul rrezikun e infeksioneve dhe forcon besimin te shërbimi publik shëndetësor”, deklaroi ministrja.

Modeli i ri i administrimit synon të sigurojë vazhdimësinë e shërbimit të sterilizimit në të gjitha spitalet publike, ndërsa OSHIS pritet të ketë një rol më të gjerë në menaxhimin e shërbimeve shëndetësore kombëtare.