Kryetari i Lidhjes Shqiptare, Ziadin Sela, ka përshëndetur miratimin e amendamentit në raportin e Parlamentit Europian për Maqedoninë e Veriut, i cili parashikon që provimi i jurisprudencës të zhvillohet në gjuhën shqipe.

Përmes një reagimi publik, Sela e cilësoi vendimin si një mesazh të qartë nga institucionet europiane, duke theksuar se provimet shtetërore duhet të zhvillohen në gjuhën shqipe pa pasur nevojë për ndryshime të reja ligjore apo rregullatore.

“Parlamenti Europian e tha qartë: provimet shtetërore duhet të jepen në gjuhën shqipe. Nuk tha as ligj të ri, as metodologji, as rregullore. Dhe jo vetëm jurisprudenca, por të gjitha provimet”, deklaroi Sela.

Ai nënvizoi se Marrëveshja e Ohrit duhet të zbatohet jo vetëm në aspektin formal dhe ligjor, por edhe në frymën e saj, duke akuzuar qeverinë aktuale se po cenon të drejtat gjuhësore të shqiptarëve dhe parimin e përfaqësimit të drejtë dhe adekuat në institucionet shtetërore.

Sipas Selës, vendimi përbën një fitore të rëndësishme për studentët shqiptarë dhe për të drejtat e tyre arsimore. Ai përgëzoi studentët për angazhimin e tyre, duke kujtuar se edhe Parlamenti Europian i ka vlerësuar protestat studentore si jo të politizuara dhe jo destabilizuese.

Në përfundim të reagimit të tij, kreu i Lidhjes Shqiptare bëri thirrje për vazhdimin e përpjekjeve në drejtim të avancimit të statusit të gjuhës shqipe në Maqedoninë e Veriut, duke kërkuar barazi të plotë kushtetuese mes gjuhës shqipe dhe asaj maqedonase.

“Duhet të vazhdojmë përpjekjet për barazi të plotë kushtetuese mes gjuhës shqipe dhe gjuhës maqedonase”, theksoi Sela.