Vetëm pak kohë pasi konfirmuan zyrtarisht fundin e lidhjes së tyre, Brikena dhe Mateo do të bashkëpunojnë sërish profesionalisht në sezonin e ri të emisionit sportiv Top Arena.

Dyshja do të jetë pjesë e panelit të programit që pritet të nisë transmetimin më 11 qershor në Top Channel.

Lajmi është bërë publik përmes një postimi të përbashkët nga Ed Manushi dhe faqja zyrtare e Procesi Sportiv, ku është njoftuar rikthimi i formatit për sezonin e ri.

Megjithatë, ajo që tërhoqi më shumë vëmendjen e ndjekësve nuk ishte vetëm rikthimi i programit, por edhe dinamika mes ish-partnerëve. Në fotografitë e publikuara gjatë përgatitjeve të emisionit, Brikena dhe Mateo shfaqen në të njëjtin ambient, por të pozicionuar larg njëri-tjetrit.

Si në fotot individuale të grupit, ashtu edhe në ato me të gjithë stafin, ata kanë zgjedhur të qëndrojnë në skaje të ndryshme, me kolegë të tjerë mes tyre, një detaj që nuk ka kaluar pa u komentuar në rrjetet sociale.

Pak ditë më parë, Brikena kishte bërë të ditur përmes një mesazhi publik se ndarja mes tyre kishte ndodhur në mënyrë paqësore dhe me respekt reciprok.

Tashmë, projekti i ri televiziv do t’i vendosë ata sërish në të njëjtin panel gjatë gjithë sezonit, duke shtuar interesin e publikut për mënyrën se si do të jetë bashkëpunimi i tyre në ekran pas ndarjes.