Presidenti i Shteteve të Bashkuara, Donald Trump, ka informuar Kongresin amerikan se përplasjet me Iranin janë mbyllur, duke theksuar se nuk ka pasur shkëmbim zjarri mes forcave amerikane dhe atyre iraniane që nga fillimi i muajit prill.

Në një letër drejtuar kryetarit të Dhomës së Përfaqësuesve, Mike Johnson, Trump bëri të ditur se situata e armiqësive, e nisur më 28 shkurt, tashmë konsiderohet e përfunduar. Megjithatë, ai paralajmëroi se Irani vijon të përbëjë një kërcënim të rëndësishëm për Shtetet e Bashkuara.

Presidenti shtoi se do të vazhdojë të drejtojë forcat e armatosura në përputhje me përgjegjësitë e tij kushtetuese si komandant i përgjithshëm, si dhe në drejtimin e politikës së jashtme të vendit.

Sipas Shtëpisë së Bardhë, armëpushimi aktual ka pezulluar afatin 60-ditor që kërkon miratimin e Kongresit për vijimin e operacioneve ushtarake, duke shmangur për momentin nevojën për një autorizim të ri për përdorimin e forcës.