Pas raportimeve për përfshirjen e Esat Gjurës, efektiv policie dhe njëherazi babai i kandidatit socialist në Peshkopi, Daniel Gjura, në një incident të rëndë me armë zjarri, janë publikuar pamje të momentit kur ai qëllon dy herë në ajër. Ngjarja ka ndodhur në fshatin Pilafes, në kulmin e tensioneve për shkak të dyshimeve për shit-blerje votash.

Edhe pse autoritetet thanë se Esat Gjura ishte arrestuar pas ngjarjes, sot ai është parë i lirë duke pirë kafe në lokalin e vëllait të tij – vend që sipas banorëve të zonës është kthyer në “shtab të korrupsionit”.

Një qytetar, i cili ka publikuar edhe pamjet e momentit, ka denoncuar se Gjura është rikthyer më pas në vendin e ngjarjes, i armatosur me shkop bejsbolli dhe pistoletë, duke thyer xhamat e makinave dhe përhapur panik në zonë.

“Kur ka thyer xhamat e makinës ishte tentativa e dytë që na iku… Doli vetë me shkop bejsbolli dhe me pistoletë në dorë. Po ju jap edhe me figurë këtë person që ka gjuajtur dy herë në ajër”, shkruan denoncuesi.

Ngjarja ka shkaktuar reagime të forta mes banorëve dhe opinioni publik kërkon hetim të plotë nga autoritetet për ndalimin e autorit dhe ndëshkimin e çdo përpjekjeje për intimidim në procesin zgjedhor. Deri më tani nuk ka një deklaratë zyrtare të Prokurorisë për statusin ligjor të Esat Gjurës.