Fabion Kuçi, i njohur në rrjetet sociale me pseudonimin “GUCCI”, është plagosur mbrëmjen e së hënës në qytetin e Durrësit. Ngjarja ka ndodhur në lagjen nr. 9, e njohur ndryshe si Lagjja e Re.

Sipas informacioneve paraprake, Kuçi është dërguar menjëherë në spital, ku ndodhet nën kujdesin e mjekëve, ndërsa gjendja e tij shëndetësore po monitorohet. Policia e Durrësit bën me dije se autori i dyshuar i plagosjes është identifikuar dhe po punohet intensivisht për kapjen dhe arrestimin e tij.

Fabion Kuçi është një emër i njohur për autoritetet, pasi më herët ka qenë i dënuar në Mbretërinë e Bashkuar për vepra të ndryshme penale, duke vuajtur disa vite burg. Prej disa muajsh ai ishte rikthyer në Shqipëri dhe ishte bërë mjaft aktiv në rrjetin social TikTok.

Në këtë platformë, “GUCCI” kishte tërhequr vëmendje për përplasjet e ashpra verbale me disa personazhe të njohur të TikTok-ut, mes tyre Kozak Braçi dhe Xhemal Ujka, i njohur si “Fire”.

Rrethanat dhe motivet e plagosjes mbeten ende të paqarta, ndërsa policia po vijon hetimet për zbardhjen e plotë të ngjarjes.