Klement Beqaj, 25 vjeç, plagosi me armë zjarri 40-vjeçarin Gledi Hoxhallari mbrëmjen e së dielës në qytetin e Fierit. Ngjarja e rëndë ka nxjerrë në pah një histori personale të ndërlikuar, pasi babai i autorit ka zbuluar se i biri kishte një lidhje me bashkëshorten e të lënduarit, Melisa Beluli, e cila kishte zgjatur 6 muaj deri në 1 vit.

Babai i Beqajt tregoi se në fillim kishte kundërshtuar lidhjen, pasi kishte mësuar se 29-vjeçarja ishte e martuar, por më vonë kishte folur me prindërit e saj dhe e kishte pranuar situatën.

“Nuk e di saktësisht sa kohë Klementi jetonte me Melisën, 6 muaj ose 1 vit. Kohët e fundit mësova që ajo ishte e martuar. Në fillim nuk isha dakord, por pastaj fola me prindërit e saj,” deklaroi ai.

Babai gjithashtu tregoi se kishte folur me djalin ditën e ngjarjes, por ai nuk kishte përmendur asgjë që të paralajmëronte për konfliktin. “Vetëm më tha që ishte mirë, dhe kaq,” tha ai.

Pas ngjarjes, Klement Beqaj është shpallur në kërkim nga policia, ndërsa babai i tij bëri një thirrje publike për të dorëzuar veten:
“Më vjen shumë keq për atë që ka ndodhur. Nuk e di ku mund të jetë tani, por i bëj thirrje të kthehet sa më shpejt.”

Policia vijon kërkimet për autorin dhe hetimet për të zbardhur rrethanat e plota të ngjarjes.