Dy autorët e sulmit vdekjeprurës në Bondi Beach të Sidneit, ku humbën jetën 15 persona, dyshohet se kanë vepruar të vetëm, pa ndihmë të jashtme dhe pa qenë të lidhur me ndonjë organizatë terroriste, bëri të ditur Policia Federale Australiane.

Në një konferencë për shtyp të mbajtur sot, komisionerja e Policisë Federale Australiane, Chrissy Barrett, deklaroi se provat e deritanishme të hetimit nuk tregojnë për përfshirjen e ndonjë rrjeti të organizuar apo mbështetje nga jashtë.
“Këta individë duket se kanë vepruar vetëm,” tha Barrett, duke theksuar se nuk ka indicie për koordinim me palë të treta apo udhëzime nga organizata terroriste, pavarësisht shkallës së rëndë të sulmit.

Sulmi ndodhi në Bondi Beach, një nga zonat më të frekuentuara të Sidneit, duke tronditur thellë opinionin publik australian. Pesëmbëdhjetë persona humbën jetën dhe disa të tjerë u plagosën, në një incident që përkoi me zhvillimin e një feste hebraike, çka fillimisht ngriti dyshime për një motiv të mundshëm fetar ose terrorist.

Komisionerja Barrett sqaroi se koha e sulmit është analizuar me kujdes nga autoritetet, por deri tani nuk ka prova që të mbështesin tezën se autorët kishin motive ideologjike ose fetare të lidhura me terrorizmin e organizuar. Sipas saj, hetimet po përqendrohen tani në profilin personal të autorëve, historinë e tyre dhe rrethanat që çuan në aktin e dhunshëm.

Ndërkohë, Policia Federale Australiane vijon punën hetimore, duke analizuar pamjet e kamerave të sigurisë, të dhënat dixhitale dhe prova të tjera materiale, me qëllim zbardhjen e plotë të motiveve dhe mënyrës së përgatitjes së sulmit. Autoritetet theksojnë se hetimi është ende në zhvillim dhe se asnjë pistë nuk është përjashtuar përfundimisht.