Khaleda Zia, kryeministrja e parë grua e Bangladeshit dhe një nga figurat më të rëndësishme të historisë politike të vendit, ka ndërruar jetë në moshën 80-vjeçare pas një sëmundjeje të gjatë, raportojnë mediat ndërkombëtare, përfshirë BBC.

Ajo u nda nga jeta në orët e para të mëngjesit, ndërsa prej ditësh ndodhej në gjendje kritike shëndetësore. Mjekët kishin bërë të ditur se gjendja e saj ishte “jashtëzakonisht e rëndë” dhe se Khaleda Zia ishte vendosur në aparate mbështetëse për jetën. Për shkak të moshës së thyer dhe problemeve të shumta shëndetësore, ekipet mjekësore kishin vlerësuar se nuk ishte e mundur të aplikoheshin disa trajtime njëkohësisht.

Lajmi i ndarjes nga jeta u konfirmua zyrtarisht nga Partia Nacionaliste e Bangladeshit (BNP), të cilën ajo e drejtoi për dekada me radhë.
“Udhëheqësja jonë e dashur nuk është më me ne. Ajo u nda nga jeta sot në orën 6 të mëngjesit,” thuhet në njoftimin e publikuar nga BNP në rrjetet sociale.

Khaleda Zia u bë kryeministre për herë të parë në vitin 1991, pasi udhëhoqi partinë e saj drejt fitores në zgjedhjet e para demokratike të Bangladeshit pas rreth dy dekadash sundimi autoritar. Ajo shërbeu më pas edhe një mandat tjetër, duke u kthyer në një figurë qendrore të jetës politike të vendit.

Politika e Bangladeshit për dekada me radhë është dominuar nga rivaliteti i ashpër mes Khaleda Zias dhe Sheikh Hasinës, një përplasje që ka ndarë thellë shoqërinë dhe ka shënuar alternime të vazhdueshme mes pushtetit dhe opozitës.

Pavarësisht problemeve serioze shëndetësore, partia e saj kishte bërë të ditur më herët se Khaleda Zia pritej të kandidonte në zgjedhjet e përgjithshme të planifikuara për muajin shkurt, zgjedhjet e para pas revolucionit që çoi në rrëzimin e rivales së saj politike, Sheikh Hasina.

Ndarja nga jeta e Khaleda Zias shënon fundin e një epoke në politikën e Bangladeshit, duke lënë pas një trashëgimi të fortë, por edhe thellësisht polemike, në historinë moderne të vendit.