Një nga viktimat që humbi jetën gjatë sulmit të një terroristi sirian pranë një sinagoge në Mançester, rezulton të jetë qëlluar aksidentalisht nga të shtënat e policisë.

Shefi i policisë për rajonin e Mançesterit, Sir Stephen Watson, konfirmoi se njëri nga dy personat e vrarë “ka pësuar një lëndim që përputhet me një plagë me armë zjarri”, pa saktësuar ende nëse kjo ishte shkaku i vdekjes.

Watson sqaroi se sulmuesi, 35-vjeçari Jihad Al-Sami, nuk kishte në posedim armë zjarri dhe se të vetmet të shtëna u qëlluan nga oficerët policorë, të cilët ndërhynë për ta ndaluar që të hynte në sinagogë.

“Ky lëndim për fat të keq mund të jetë shkaktuar si një pasojë tragjike dhe e paparashikueshme e veprimeve urgjente të ndërmarra nga oficerët e mi për t’i dhënë fund këtij sulmi të egër”, – tha Watson.

Ndërkohë, një nga tre personat e plagosur ndodhet në spital me një plagë nga armë zjarri, por është jashtë rrezikut për jetën. Dyshohet se të dy viktimat që u qëlluan ndodheshin shumë afër njëri-tjetrit, pas derës së sinagogës, në momentin kur oficerët hapën zjarr.

Autoritetet britanike kanë nisur një hetim të plotë për ngjarjen, e cila ka tronditur opinionin publik dhe ka rritur shqetësimet për sigurinë e komunitetit hebre në vend.