Protestat kundër qeverisë dhe kryeministrit Edi Rama kanë hyrë këtë të premte në ditën e 69-të, ndërsa qytetarët pritet të mblidhen sërish në Bulevardin “Dëshmorët e Kombit” për të vijuar aksionin e tyre protestues.

Prej 68 ditësh, protestuesit kanë deklaruar se do ta vazhdojnë lëvizjen deri në dorëheqjen e kryeministrit Edi Rama dhe hetimin e tij nga Struktura e Posaçme Kundër Korrupsionit dhe Krimit të Organizuar (SPAK).

Edhe në ditën e 69-të, protesta pritet të shoqërohet me marshim në rrugët e kryeqytetit dhe me thirrje kundër qeverisë. Mes sloganeve që organizatorët kanë paralajmëruar se do të dëgjohen janë: “Rama në burg”, “Shqipëria kërkon revolucion”, “Ju erdhi fundi”, “Edi Rama, jep dorëheqjen”, “Atdheu nuk shitet” dhe “Bashkimi bën fuqinë”.

Protestuesit kanë paralajmëruar gjithashtu përshkallëzim të aksionit, përfshirë bllokimin e rrugëve, nëse kërkesat e tyre nuk merren në konsideratë.

Sipas organizatorëve, protestat do të vijojnë edhe në ditët në vazhdim, me kërkesën për dorëheqjen e kryeministrit dhe hetimin e tij nga SPAK.