Partia Socialiste dhe Partia Demokratike kanë arritur një konsensus për ndryshimet në Rregulloren e Kuvendit, pas negociatave që kanë zgjatur disa ditë mes përfaqësuesve të dy palëve, Ivi Kaso dhe Bledi Çomo.

Sipas burimeve parlamentare, marrëveshja është finalizuar pasditen e së mërkurës dhe përfshin një sërë kompromisesh mes mazhorancës dhe opozitës, veçanërisht në mënyrën e raportimit të institucioneve të pavarura në Kuvend.

Një nga ndryshimet kryesore lidhet me raportimin e institucioneve të pavarura, ku është rënë dakord që në seancë plenare të paraqiten vetëm ato institucione që kanë detyrim kushtetues, ndërsa të tjerat do të raportojnë vetëm në komisione parlamentare.

Në këtë kuadër, është parashikuar që edhe drejtuesi i SPAK të mos raportojë më në seancë plenare, por vetëm në Komisionin e Ligjeve dhe në Komisionin e Mbikëqyrjes Institucionale.

Sipas marrëveshjes, në seancë plenare do të vijojnë të raportojnë vetëm disa institucione kryesore si Këshilli i Lartë Gjyqësor, Këshilli i Lartë i Prokurorisë, Prokurori i Përgjithshëm, Banka e Shqipërisë, Kontrolli i Lartë i Shtetit dhe Avokati i Popullit.

Në paketën e dakordësuar përfshihen edhe ndryshime në procedurat parlamentare për procesin e integrimit europian. Demokratët kanë pranuar që ligjet që lidhen me anëtarësimin në BE të kalojnë me procedurë të përshpejtuar vetëm kur ekziston një afat i përcaktuar nga Brukseli.

Ndërkohë, mazhoranca është tërhequr nga propozimi për kufizimin e kohës së fjalës së deputetëve në 5 minuta, duke e lënë në fuqi kufirin aktual prej 10 minutash.

Po ashtu, është arritur dakordësia që Sekretariati i Etikës të ketë përbërje të barabartë mes mazhorancës dhe opozitës, ndërsa është parashikuar që vota e sekretarit të PS-së të jetë përcaktuese në rastet kur ka bllokim vendimmarrjeje.

Marrëveshja përfshin edhe barazi në numrin e këshilltarëve mes dy grupeve kryesore parlamentare.

Nga ana tjetër, socialistët kanë refuzuar propozimin e PD-së për ndarjen e Komisionit të Jashtëm nga ai i Integrimit Europian.

Ndryshime janë bërë edhe në Komisionin për Mbikëqyrjen Institucionale, ku është rënë dakord që institucionet e pavarura të raportojnë vjetorët në komisionet përkatëse, ndërsa para komisionit të drejtuar nga Fatmir Xhafaj të raportojnë për zbatimin e rezolutave.

Drafti i dakordësuar pritet të kalojë nesër në Këshillin e Rregullores dhe më pas të votohet në seancë plenare në Kuvend.