Në emisionin investigativ “Në Shënjestër” të gazetares Klodiana Lala, janë publikuar pamjet që tregojnë momentin kur Safet Bajri largohet nga vendngjarja pas vrasjes së Fatbardh Licit në Shkodër në vitin 2018.

Sipas Lalës, këto janë provat kryesore të përdorura nga SPAK në procesin ndaj Safet Bajrit, Astmer Bilalit dhe Behar Bajrit, të cilët dyshohen për përfshirje në ekzekutimin e Licit.

Pamjet janë siguruar nga dhjetëra kamera sigurie dhe tregojnë lëvizjet e dy personave të identifikuar nga prokuroria si Personi 1 dhe Personi 2. Këta individë u kapën nga kamerat që nga momenti i kryerjes së krimit deri te gjetja e makinës së djegur, e cila dyshohet se u përdor në vrasje.

Një tjetër detaj i rëndësishëm është përdorimi i një makine të bardhë, e cila i përkiste partneres së Safet Bajrit. Kjo e fundit është arrestuar për përkrahje të autorit të krimit dhe sigurimin e kushteve për vrasjen.

SPAK vazhdon hetimet për këtë ngjarje, ndërsa procesi gjyqësor ndaj të dyshuarve është në vijim.