Presidenti rus Vladimir Putin zhvilloi një mbledhje operative me Këshillin e Sigurisë për të diskutuar zhvillimet e fundit lidhur me planet e Shteteve të Bashkuara për rifillimin e testeve të armëve bërthamore.
Në takim morën pjesë ministri i Mbrojtjes Andrey Belousov, shefi i Shtabit të Përgjithshëm Valery Gerasimov, drejtori i inteligjencës së jashtme Sergey Naryshkin, sekretari i Këshillit të Sigurisë Sergey Shoigu dhe kreu i FSB-së Alexander Bortnikov.
Putin theksoi se Rusia “vazhdon të respektojë në mënyrë rigoroze” Traktatin për Ndalimin e Plotë të Testeve Bërthamore (CTBT), por paralajmëroi se Moska do të reagojë nëse vendet e tjera e shkelin atë.
“Rusia gjithmonë i ka respektuar dhe vazhdon t’i respektojë angazhimet e saj në kuadër të Traktatit për ndalimin e plotë të eksperimenteve bërthamore dhe ne nuk kemi plane për t’u larguar prej tij. Megjithatë, nëse Shtetet e Bashkuara ose vende të tjera pjesëmarrëse në Traktat kryejnë testime të tilla, edhe Rusia do të detyrohet të ndërmarrë masa përkatëse përgjigjeje,” — deklaroi Putin.
Në përfundim të mbledhjes, kreu i Kremlinit i ngarkoi Ministrinë e Jashtme, Ministrinë e Mbrojtjes, shërbimet e inteligjencës dhe institucionet shkencore që të mbledhin informacion të detajuar mbi çështjen, ta analizojnë atë në kuadër të Këshillit të Sigurisë dhe të paraqesin propozime konkrete për mundësinë e përgatitjeve për testime bërthamore nëse situata ndërkombëtare e kërkon.
Kjo deklaratë e Putinit shihet si një sinjal paralajmërues ndaj Perëndimit, në një kohë kur tensionet mes Moskës dhe Uashingtonit mbeten të larta për shkak të luftës në Ukrainë dhe garës së re të armatimeve.
