Tragjedia e rëndë e ndodhur në Durrës, ku një aksident i mori jetën dy fëmijëve dhe plagosi një tjetër të mitur, vijon të trondisë opinionin publik dhe komunitetin lokal.

Në një intervistë televizive, babai i 8-vjeçarit të plagosur ka rrëfyer gjendjen e rënduar shëndetësore të të birit dhe momentet pas ngjarjes.

Ai tha se fëmija fillimisht ka qenë i vetëdijshëm dhe ka komunikuar, por ka kërkuar vazhdimisht të dijë për shokët e tij të përfshirë në aksident.

“Djali komunikonte, por kërkonte shokët… vetëm për ta pyeste,” u shpreh ai, duke shtuar se i mituri është transportuar fillimisht në spitalin e Durrësit dhe më pas është dërguar në Tiranë për trajtim më të specializuar.

Sipas tij, një fëmijë tjetër që ndodhej me ta në momentin e aksidentit ka shpëtuar pa dëmtime serioze, pasi ndodhej në anë të rrugës në momentin e përplasjes.

Babai tregoi gjithashtu se djali ka pësuar dëmtime të shumta, përfshirë fraktura në legen dhe në këmbë, si dhe lëndime në mushkëri, duke u cilësuar nga mjekët si një rast i rënduar.

“E nxorën nga reanimacioni dhe tani është në dhomë të veçantë, por gjendja mbetet e rëndë,” tha ai.

Ai shtoi se i mituri nuk mbante mend detaje të plota të ngjarjes, përveç faktit se, sipas tij, “makina po vinte shumë shpejt”.

Ngjarja vijon të jetë nën hetim, ndërsa gjendja shëndetësore e të plagosurit mbetet nën monitorim të vazhdueshëm nga mjekët.