Policia e Kurbinit ka dalë me një njoftim zyrtar në lidhje me të shtënat me armë zjarri të regjistruara mbrëmjen e sotme në hyrje të Laç, ku është qëlluar në drejtim të një automjeti me të cilin lëvizte shtetasi me inicialet M.N.

Sipas policisë, autorët e dyshuar janë shtetasi P. Gj. dhe dy djemtë e tij, H. Gj. dhe P. Gj., ku njëri prej tyre dyshohet se ka hapur zjarr ndaj mjetit.

“Rreth orës 18:55, në afërsi të hyrjes së qytetit të Laçit, në rrethana ende të paqarta, është qëlluar me armë zjarri në drejtim të automjetit me të cilin lëvizte shtetasi M. N. Nga të shtënat nuk ka shtetas të dëmtuar. Nga veprimet e shpejta janë identifikuar autorët e dyshuar: shtetasi P. Gj. dhe dy djemtë e tij, shtetasit H. Gj. dhe P. Gj. (njëri prej tyre dyshohet se ka qëlluar me armë zjarri në drejtim të automjetit), ndërsa vijojnë kontrollet për kapjen e tyre”, thuhet në njoftimin zyrtar.

Fatmirësisht, nga të shtënat nuk raportohet për të plagosur apo viktima.

Grupi hetimor ndodhet në vendngjarje dhe po punon për zbardhjen e plotë të rrethanave dhe dokumentimin ligjor të rastit, ndërsa vijojnë kontrollet për kapjen e autorëve të dyshuar.