Kryeministri Edi Rama, gjatë Asamblesë së Partisë Socialiste, ka shprehur bindjen se në zgjedhjet e ardhshme, Partia Demokratike nuk do të arrijë të marrë më shumë mandate sesa në vitin 1997. “Në zgjedhjet e ardhshme PD zor se do të marrë më shumë mandate se në 1997, mbajeni shënim,” tha Rama.
Duke ironizuar, ai theksoi se nuk shikon filxhan dhe nuk parashikon të ardhmen, por PS-ja di të lexojë mendjen e popullit, jo vetëm përmes patronazhistëve, por edhe përmes anketave të përmuajshme.
“Humnëra është destinacioni ekskluziv i asaj partie, i zgjedhur me vullnet të lirë,” shtoi kryeministri, duke nënvizuar se, ndryshe nga viti 1997 kur e gjithë Shqipëria ishte në një situatë të vështirë, këtë herë, sipas tij, humbja do të jetë e vetme për PD-në.
