Kryeministri Edi Rama ka përsëritur qëndrimin e tij se pa angazhimin e thellë dhe vullnetin e hekurt të Partisë Socialiste (PS), as SHBA dhe as Bashkimi Europian (BE) nuk do të kishin mundur të realizonin reformën në drejtësi. Gjatë një takimi me ambasadorët e akredituar në Shqipëri, për procesin e thellimit të reformave në mirëqeverisje, sundimin e ligjit dhe luftën kundër korrupsionit, Rama iu përgjigj edhe akuzave të opozitës, e cila ka pretenduar se ai dhe Fatmir Xhafaj po tentojnë të bllokojnë SPAK-un dhe të kthejnë pas reformat në drejtësi.

Në fjalën e tij, Rama theksoi se akuzat e opozitës janë të pabaza dhe e cilësoi situatën si një “komplot” të shpikur nga ata që përmendin SPAK dhe drejtësinë. Sipas tij, Partia Socialiste ka qenë forcë udhëheqëse për reformën në drejtësi që nga fillimi, dhe pa këtë forcë dhe mbështetje të fuqishme, as SHBA, as BE, dhe as aleatët strategjikë nuk do të kishin mundur ta çonin përpara këtë proces.

“U gjet një fjalë magjike që të dëgjoni se Fatmir Xhafaj dhe Edi Rama kanë një plan të errët për të bllokuar SPAK-un, dhe për të kthyer përmbys reformën në drejtësi. Prandaj bëjnë mbledhje sekrete me një grup njerëzish në PS dhe po thurin një komplot. Kur përmend SPAK dhe drejtësinë ka shumë sensibilitet dhe shumë forca që angazhohen për të dalë në mbrojtje”, tha Rama.

Rama gjithashtu nënvizoi se Shqipëria ka një mundësi historike për të përfunduar procesin e anëtarësimit në BE deri në vitin 2030. Ai përmendi angazhimin e qeverisë për të përmbushur detyrat që dalin nga negociatat me BE-në dhe theksoi se është e nevojshme që të gjithë institucionet shqiptare të bashkëpunojnë për realizimin e këtij objektivi.