Kryeministri Edi Rama ka reaguar sërish lidhur me aksionin për lirimin e hapësirave publike në bregdet, duke publikuar këtë herë pamje nga Gjiri i Lalzit, ku brenda ditës janë hequr qindra shezllonë e çadra të vendosura pa leje në zonën publike.
Në një postim në rrjetet sociale, Rama shkruan se ky është një hap vendimtar drejt një qasjeje të re për menaxhimin e bregdetit, e cila synon të rikthejë vijën bregdetare në shërbim të të gjithë qytetarëve, dhe jo vetëm një pakice që e shfrytëzon për përfitime tregtare.
“A ia vlen të humbasësh gjithë këta shezllonë e çadra për të sfiduar shtetin?! Nuk e di, këta e dinë – në Lalëz këta e gdhinë si zaptues me qindra çadra dhe e ngrysën si të përzënë me duar në xhepa”, shkruan kryeministri, duke e ilustruar edhe me fotografi të zonës pas ndërhyrjes së Inspektoratit.
Ai nënvizon se ky aksion është vetëm fillimi, ndërsa shton se për të mbrojtur hapësirat publike nuk do të ketë tolerime.
“Kthesa e këtij viti me plazhet publike është vetëm hapi i parë i një qasjeje të re ndaj buzës së detit, e cila është e të gjithë shqiptarëve, jo vetëm e disa tregtarëve”, theksoi Rama.
Aksioni për lirimin e hapësirave publike ka nisur disa javë më parë në disa pika të bregdetit shqiptar, duke përfshirë ndërhyrje në Dhërmi, Ksamil, Shëngjin dhe tashmë edhe në Gjirin e Lalzit. Autoritetet kanë paralajmëruar masa të ashpra për çdo subjekt që shkel ligjin dhe vendos struktura në kundërshtim me rregullat.
