Kryeministri Edi Rama zhvilloi sot një konferencë të përbashkët për mediat me Kryetaren e Këshillit të Ministrave të Republikës së Bosnje dhe Hercegovinës, Borjana Krišto më Sarajevë.

Rama ndodhet sot në Bosnje Hercegovinë, në kuadër të turit të tij dy ditor në rajon.

Gjatë fjalës së tij Rama tha se dy vendet po punojnë për hapjen e ambasadës shqiptare në Sarajevë.

Sa i përket samitit të Procesit të Berlinit që do të mbahet në Tiranë, Kryeministri Edi Rama theksoi se 6 vendet e Ballkanit do të kërkojnë që të marrin më shumë mbështetje financiare nga Bashkimi Europian.

Edi Rama: Uroj që ky të jetë një shembull se si vendimet e rëndësishme për mirëqenien e përbashkët duhet të merren dhe të zbatohen. Dëshirojmë ti forcojmë marrëdhëniet me Bosnje Hercegovinën, për të hapur ambasadën e Shqipërisë në Bosnje. Në Bosnjë Hercegovinë jeton një komunitet shqiptar. Po përgatisim hapjen e ambasadës shqiptare në Sarajevë. Nga ana tjetër nuk është sekret që Shqipëria mbron edhe interesat e shqiptarëve në Kosovë dhe në vende të tjera dhe unë ia thashë edhe kryeministres që jemi të interesuar që marrëveshjet e Procesit të Berlinit, dhe marrëveshja për lëvizjen e lirë me kartë identiteti për qytetarët shqiptarë të Kosovës të mundësohet sepse është e pakuptimtë që të kemi problematika të kësaj natyre ndërkohë që politika duhet të shërbejë.