DURRËS – Dhimbja e një nëne që humb fëmijën në mënyrë tragjike është e pashprehshme, por rrëfimi i saj publik ka tronditur opinionin. Një ditë pas aksidentit fatal që i mori jetën 12-vjeçarit Ena Muçaj, nëna e tij ka folur për herë të parë, duke përshkruar momentet e para pas ngjarjes së rëndë.

Në një lidhje direkte për mediat, ajo tregoi se vajza e saj ishte dëshmitare e aksidentit dhe kishte përjetuar traumë të fortë, pasi nuk arriti ta njihte menjëherë të vëllain.

“Goca e pa gjithë ngjarjen. Ishte e tmerruar… nuk e njohu vëllain,” rrëfeu ajo mes lotësh.

Nëna e 12-vjeçarit tregoi se mbërriti menjëherë në vendngjarje dhe u përball me një skenë të rëndë, duke marrë të birin në krahë në përpjekje për ta ndihmuar.

“Isha aty… e mora në krahë. Nuk e njoha menjëherë. E njoha vetëm nga kraharori,” tha ajo.

Sipas saj, djali kishte qenë në proces trajtimi dhe përballej me sfida shëndetësore, por kishte besim dhe shpresë për të ardhmen.

“Më thoshte çdo ditë: ‘Do bëhem mirë me mami’,” kujtoi ajo.

Ngjarja tragjike ka shkaktuar reagime të forta në opinionin publik, duke rikthyer në vëmendje çështjen e sigurisë rrugore dhe përgjegjësisë së drejtuesve të mjeteve, sidomos në zonat e banuara.

Autoritetet vijojnë hetimet për rrethanat e aksidentit, ndërsa familja e të miturit përballet me një humbje të pazëvendësueshme.