Sekretari i Përgjithshëm i NATO-s, Mark Rutte, ka deklaruar se presidenti rus Vladimir Putin mbetet pengesa kryesore për përfundimin e luftës së Rusisë ndaj Ukrainës, duke theksuar se mungesa e vullnetit politik nga Kremlini po zgjat konfliktin.

Në një intervistë për gazetën gjermane Bild, e publikuar sot, Rutte u shpreh se Putin është i gatshëm të sakrifikojë numra shumë të mëdhenj ushtarësh dhe civilësh, pavarësisht faktit se Rusia nuk ka arritur fitore të rëndësishme në terren.

Sipas tij, gjatë këtij viti forcat ruse kanë bërë përparime minimale territoriale, duke pushtuar më pak se 1% të territorit ukrainas, ndërsa humbjet në anën ruse vlerësohen deri në 1.1 milionë të vrarë ose të plagosur.

Kreu i NATO-s theksoi se presidenti amerikan Donald Trump është i përkushtuar për t’i dhënë fund konfliktit dhe se ai mund të jetë lideri i vetëm që ka fuqinë politike për ta detyruar Putinin të pranojë paqen. Rutte konfirmoi se Trump ka shfaqur disa herë humbje durimi gjatë këtij viti për shkak të ngecjeve në negociata, por nënvizoi se roli i Shteteve të Bashkuara mbetet vendimtar për arritjen e një zgjidhjeje.

Në një intervistë të mëparshme për median spanjolle El País, Rutte kishte deklaruar se lufta e Rusisë ndaj Ukrainës mund të përfundojë deri në fund të vitit 2025, nëse rritet presioni ndërkombëtar dhe krijohen kushtet e duhura për negociata reale.

Deklaratat e tij vijnë në një moment kritik për sigurinë evropiane, teksa aleatët e NATO-s vijojnë mbështetjen ushtarake dhe politike për Ukrainën, ndërsa kërkojnë rrugë konkrete për një paqe të qëndrueshme.