Prokuroria e Posaçme kundër Korrupsionit dhe Krimit të Organizuar (SPAK), në bashkëpunim me Byronë Kombëtare të Hetimit dhe partnerët ndërkombëtarë, ka zbardhur detaje nga hetimi mbi platformën e paligjshme online “Rydox”, e konsideruar si një “treg i nëndheshëm” për shitjen e të dhënave personale dhe mjeteve për krim kibernetik.

Sipas dosjes hetimore, autoritetet amerikane, përmes FBI, kishin nisur hetimet që në nëntor të vitit 2022, duke identifikuar aktivitetin e paligjshëm të platformës, e cila kishte qenë aktive që prej vitit 2016. Edhe pse për një periudhë në vitin 2020 u mbyll, “Rydox” u rihap sërish në shtator të po atij viti.

Platforma reklamonte aktivitetin e saj në forume kriminale si RaidForums dhe ofronte për shitje lista spam-i, kredenciale hyrjeje në llogari të ndryshme (email, e-commerce, rrjete takimesh), si dhe udhëzues për përdorimin e tyre. Sipas SPAK, përdoruesit kryesorë të kësaj platforme ishin aktorë të krimit kibernetik që blinin dhe shisnin të dhëna identifikuese personale (PII).

Në shkurt 2023, në bashkëpunim me autoritete të huaja, u sekuestrua një server i lidhur me domenin rydox.cc, nga ku u siguruan të dhëna për mbi 18 mijë përdorues, përfshirë emaile, transaksione virtuale dhe materiale të blera në platformë.

Nga hetimet rezulton se një nga zhvilluesit e faqes ishte shtetasi nga Kosova, Shpend Sokoli, i cili bashkëpunonte me Ardit dhe Jetmir Kutleshi. Sipas SPAK, komunikimet mes tyre tregojnë qartë organizimin dhe funksionimin e platformës.

Në një nga bisedat e zbardhura, njëri prej tyre shprehet:
“qysh muna me bo psh ni update… me i marr qdo her fresh userat qe e kan reseller 1”, ndërsa përgjigjja është: “Mujm bojm najsen… spo di”.

Në komunikime të tjera, përmenden edhe çështje teknike për serverat dhe domenet:
“Kit domain rydox.ru ma kan suspendu, tash e bleva rydox.cc… spo di qfar nameservera me i qit…”.

Gjithashtu, evidentohet edhe përfshirja në transaksione financiare, ku diskutohet për blerje me bitcoin:
“Me bit coin 1 blerje me ma kry… dmth ti mi bon 50 eki blerje une ti heki prej cmimit te rydoxit”.

Sipas SPAK, këto komunikime dëshmojnë jo vetëm bashkëpunimin mes të dyshuarve, por edhe qëllimin për përfitime materiale nga aktiviteti i paligjshëm.

Hetimet vijojnë, ndërsa autoritetet shqiptare dhe amerikane po thellojnë bashkëpunimin për të identifikuar persona të tjerë të përfshirë në këtë rrjet ndërkombëtar të krimit kibernetik.