Në disa shtete amerikane vazhdon votimi i hershëm për zgjedhjet e ngushta presidenciale, ndërsa zyrtarët lokalë dhe shtetërorë po përballen me sfida të shumta. Materiali i përgatitur nga gazetarët e Zërit të Amerikës, Natasha Mozgovaya, Deborah Bloom dhe Rafael Saakov, hedh dritë mbi vështirësitë me të cilat po përballen zyrtarët zgjedhorë në disa zona të Karolinës së Veriut të prekura nga uragani dhe rastet e djegies së kutive të votimit në Uashington dhe Oregon, të cilat kanë shtuar presionin ndaj zyrtarëve përgjegjës për mbikëqyrjen e zgjedhjeve.

Në Oregon dhe Uashington, organet e rendit po kërkojnë autorët që dogjën dy kuti votimi, duke shkatërruar qindra fletë votimi. Pasi policia paralajmëroi për mundësi të tjera sulmesh, disa qytetarë shkuan në qendrat e votimit për të hedhur votën. Banorja e Vankuverit, Bre Belter, tha se ndonëse preferonte votimin me postë, ngjarjet e fundit e shtynë të votojë personalisht për të siguruar votën e saj.

Robert Moore, një nga votuesit e prekur nga djegia e kutive të votimit, e sheh incidentin si një përpjekje për të nxitur trazira civile. Ndërkohë, zyrtarët zgjedhorë në qarkun Clark të Uashingtonit po bëjnë të pamundurën që votuesit e prekur të marrin fletëvotime të reja dhe po mbledhin votat çdo mbrëmje nga kutitë e votimit.

Në Karolinën e Veriut, një nga shtetet kyçe për zgjedhjet, përmbytjet nga uragani Helene kanë shkaktuar humbje të dokumenteve të identitetit, të nevojshme për votim. Ruth Hall, një anëtare e qendrës së votimit në qarkun Buncombe, tha se përdoren formulare të veçantë për votimin provizor për ata që nuk kanë dokument identifikimi për shkak të përmbytjeve.

Me dhjetëra mijëra njerëz të zhvendosur dhe qendra votimi të mbyllura, zyrtarët u kanë bërë thirrje banorëve të Karolinës së Veriut të përfshihen në votimin e hershëm. Paul Choy, një nga votuesit që mori pjesë në votim në Asheville, theksoi rëndësinë e pjesëmarrjes për ata që u prekën nga uragani, ndërkohë që sondazhet tregojnë një garë të ngushtë në këtë shtet të rëndësishëm.