Një aksident i rëndë ka ndodhur në qytetin perëndimor gjerman të Gelsenkirchenit, ku dy tramvaje janë përplasur pranë stadiumit të Schalke, duke shkaktuar plagosjen e të paktën 25 personave.

Sipas informacioneve paraprake të policisë, njëri prej tramvajeve ishte një tren stërvitor, i cili po lëvizte përpara një tramvaji të linjës së rregullt me pasagjerë. Për arsye ende të paqarta, treni i parë është ndalur papritur, duke bërë që tramvaji i dytë të mos arrinte të frenonte në kohë dhe të përplasej fuqishëm në pjesën e pasme të tij.

Si pasojë e përplasjes, të dy mjetet kanë pësuar dëmtime të konsiderueshme, ndërsa shërbimet e emergjencës janë mobilizuar menjëherë në vendngjarje.

Policia bëri me dije se rreth 25 persona kanë mbetur të plagosur. Shtatë prej tyre janë në gjendje të rëndë, ndërsa për tre të tjerë nuk përjashtohet rreziku për jetën.

Të plagosurit kanë marrë ndihmën e parë në vendngjarje, ndërsa disa prej tyre janë transportuar drejt spitaleve të zonës për trajtim të mëtejshëm.

Autoritetet kanë ngritur një grup të posaçëm hetimor për të zbardhur shkaqet e aksidentit dhe për të përcaktuar rrethanat që çuan në ndalimin e papritur të trenit të parë.

Pas përplasjes, rruga kryesore Kurt-Schumacher-Straße u mbyll në të dyja drejtimet, duke shkaktuar vështirësi në qarkullim. Në zonë u angazhuan dhjetëra ekipe shpëtimi, ambulanca, si dhe psikologë për të ofruar mbështetje për pasagjerët dhe personat e përfshirë në ngjarje.