Ndryshimet e papritura të temperaturave shpesh shoqërohen me rritje të rasteve të virozave dhe të ftohurit, sidomos tek fëmijët dhe të moshuarit. Megjithatë, antibiotikët shpesh nuk janë zgjidhja më e mirë për trajtimin e këtyre gjendjeve, për shkak të efekteve të tyre anësore.
Në të tilla raste, përveç këshillimit me mjekun dhe trajtimeve sipas simptomave, kurat natyrale mbeten një alternativë ideale. Një përzierje e fuqishme natyrale me bazë mjaltin dhe sherebelën është një zgjedhje efektive për qetësimin e kollës, rritjen e energjisë dhe forcimin e organizmit.
Sherebela, thesari natyror i Shqipërisë
Sherebela, një bimë medicinale me vlera të mëdha, është shumë e përhapur në Shqipëri, sidomos në zonat e Malësisë së Madhe. Kjo bimë e çmuar gjendet gjithashtu në malësitë e Veriut dhe Jugut të vendit dhe njihet ndërkombëtarisht për cilësinë e saj unike. Sipas burimeve, sherebela shqiptare eksportohet kryesisht në Shtetet e Bashkuara, Francë dhe Gjermani, duke u vlerësuar si një nga më cilësoret në botë.
Përgatitja e çajit të sherebelës dhe mjaltit
Përbërësit:
– 30 gramë gjethe të thata sherebele
– Një majë luge piper i kuq djegës
– 3 gota ujë
– Mjaltë (mundësisht mjaltë lulesh)
– Lëng limoni (opsionale)
Udhëzime:
1. Vendosni sherebelën, piperin dhe ujin në një tenxhere dhe ziejini derisa uji të përgjysmohet.
2. Hiqeni nga zjarri dhe lëreni të ftohet pak. Shtypni gjethet e sherebelës për të nxjerrë sa më shumë lëng.
3. Kullojeni lëngun dhe shtoni mjaltë për shije dhe lëng limoni sipas dëshirës.
4. Pasi të jetë ftohur, ruajeni në frigorifer. Konsumoni 1-2 lugë gjelle sipas nevojës për qetësimin e dhimbjes së fytit dhe kollës.
Paralajmërime dhe këshilla shtesë
– Ky çaj nuk rekomandohet për gratë shtatzëna.
– Përdorimi i sasive të mëdha të sherebelës mund të shkaktojë rrahje të shpeshta të zemrës.
– Nëse vuani nga diabeti, përdorimi i këtij çaji duhet të bëhet vetëm pas konsultimit me mjekun tuaj.
Kjo kurë natyrale është një mënyrë e sigurt dhe efikase për të përballuar simptomat e virozave dhe të ftohurit, duke përfituar nga dhuratat e natyrës shqiptare.
