Erhun Obanor u dënua me pesë ndeshje pasi në fund të duelit të Kupës me Vllazninë goditi me shkelm Herald Markun. Nigeriani mori në moment karton të kuq dhe sot Komisioni i Disiplinës dhe Etikës mori edhe vendimin për ta pezulluar.
Gjithsesi në sherrin e ndodhur në “Loro Boriçi” protagonist nuk ka qenë vetëm Obanor. Komisionit disiplinor dhe zyrtarët te ndeshjes nuk ka pikasur një tjetër futbollist që ka qenë pjesë e konfliktit.
Pamje filmike tregojnë sulmuesin e Vllaznisë, Demir Imeri, teksa e godet më pas Obanor të Laçit. Komisioni i Disiplinës edhe një herë tjetër tregon se ka “fobi” të shohë pamjet filmike dhe Imeri për momentin ka shpëtuar.
Ditën e djeshme Obanor pas sherrit reagoi dhe theksoi se ishte quajtur nga Herald Marku “majmun i zi”. Mesfushori i Vllaznisë i hodhi poshtë pretendimet e nigerianit dhe i cilësoi si një shpifje e ulët.
