Në Prishtinë u zhvillua seanca ndaj Naim Murselit, Granit Plavës dhe Kushtrim Kokalla, të akuzuar për vrasjen e Liridona Ademajt.

Prokurorja Javorka Perlinçeviç ka propozuar administrimin e disa provave kyçe, duke përfshirë borxhet e Murselit, të cilat arrijnë 475,968.77 euro në mars të vitit 2024, duke përfshirë borxhet ndaj individëve dhe institucioneve financiare.

Gjithashtu, prokurorja ka paraqitur përgjigjen nga autoritetet suedeze që konfirmon se viktima kishte një sigurim jetësor që fillonte më 25 qershor 2022, në vlerë 3 milionë krune suedeze, dhe sipas ligjit suedez, përfitues do të ishte bashkëshorti në rast të humbjes së jetës, nëse nuk ka vartës të tjerë.

Në rrjetin social WhatsApp, janë gjetur kontakte mes Granit Plavës dhe Naim Murselit, të cilat filluan më 23 nëntor 2023 dhe vazhduan deri më datën e vrasjes, më 29 nëntor 2023. Murseli i kishte dërguar mesazh Plavës më 28 nëntor 2023: “Shok, sigurisht kryhet nesër…”, duke sugjeruar planifikimin e ngjarjes.

Seanca vazhdon ndërkohë që prokuroria po administron provat e tjera për të dokumentuar tërësisht ngjarjen.