Europol ka shpallur ndër më të kërkuarit në kontinent shqiptarin Shpendi Malo, 34 vjeç, i dyshuar për një krim të rëndë në Gjermani, që tronditi opinionin publik në shtator të vitit 2019. Ai është përfshirë në listën zyrtare “Europe’s Most Wanted”, dhe autoritetet e konsiderojnë të armatosur dhe jashtëzakonisht të rrezikshëm.

Sipas të dhënave zyrtare, në mbrëmjen e 11 shtatorit 2019, Malo dyshohet se joshur një të ri shqiptar, 27 vjeç, përmes celularit dhe e ka tërhequr në pyllin Dölauer Heide, një zonë e pyllëzuar në qytetin Halle (Saale). Aty, ai e ka therrur me thikë, duke e lënë të pajetë në vendngjarje.

Për të fshehur gjurmët e krimit, trupi i viktimës është hedhur në një kanal dhe është mbuluar me gjethe. Kalimtarë të rastësishëm e kanë zbuluar vetëm katër ditë më pas, më 15 shtator. Deri më sot, autoritetet gjermane nuk kanë arritur të konfirmojnë nëse Malo ka vepruar i vetëm apo në bashkëpunim me persona të tjerë, megjithëse provat në vendngjarje sugjerojnë për një bashkëpunëtor.

Motivi i vrasjes mbetet ende i paqartë, por hetimet dyshojnë për një mosmarrëveshje të lidhur me trafikun e drogës, një pistë që nuk është mbyllur nga hetuesit.

Në momentin e ngjarjes, Malo kishte flokë të errët dhe të drejtë, fizik i dobët dhe disa nishane karakteristike në fytyrë, përfshirë një të madh poshtë syrit të djathtë. Këto veçori janë bërë publike nga Europol për të ndihmuar në identifikimin e tij.

Apeli i Europol-it është i qartë: qytetarët që mund të kenë informacion për vendndodhjen e tij, të mos i afrohen, por të lajmërojnë menjëherë policinë apo autoritetet e zbatimit të ligjit.

Ky rast shton dhe një herë shqetësimin për përfshirjen e shtetasve shqiptarë në ngjarje të rënda kriminale në Europë, dhe vë në qendër të vëmendjes nevojën për bashkëpunim më të thelluar mes policive ndërkombëtare.