Me kërkesë të Prokuroria pranë Gjykatës së Shkallës së Parë të Juridiksionit të Përgjithshëm Berat janë shpallur fajtor dhe dënuar katër shtetas për veprën penale “Prodhimi dhe shitja e narkotikëve”, e kryer në bashkëpunim.

Hetimet kanë zbuluar një skemë të shpërndarjes së kokainës në një lokal nate në qytetin e Dimalit, ku droga shpërndahej në mënyrë të organizuar me kodin “amaro”, për të shmangur zbulimin.

Sipas dosjes hetimore, pronari i lokalit dyshohet se mbante dhe organizonte aktivitetin, ndërsa truproja, menaxheri dhe kamarieri përfshiheshin në shpërndarje dhe komunikim me klientët që kërkonin lëndë narkotike.

Nga hetimet rezulton se kokaina shitej në doza të vogla dhe fshihej në ambiente të lokalit, ndërsa klientët e konsumonin shpesh në tualete.

Gjykata ka pranuar kërkesën e prokurorisë dhe ka dhënë dënime me burg për të katër të pandehurit, të reduktuara në zbatim të gjykimit të shkurtuar, me masa që variojnë nga 4 vite e 8 muaj deri në 8 vite burgim për organizatorin e dyshuar.

Rasti është ndjekur nga strukturat hetimore të Policisë së Shtetit në Dimal, pas informacioneve për aktivitet të vazhdueshëm të shpërndarjes së drogës në zonë.